سـلام ياحـر تعـلا المراقـيـب

سلام ياحر تعلا المراقيب
صيده من اسمان الحباري بكفَّّه

طلعٍ لصقاره كفوفه مخاضيب
ولاكل زول للحمامه يخفَّه

مجناه من روس الجبال المهاضيب
يفداه طيرالجير مافيه لفَّه

سلام يابن سعيد رد بتراحيب
ياناصر العيده بقولي وشفَّه

من الرجال اللي تربو على الطيب
ومقدام لاجى بالرجاجيل خفَّه

سلام ياضرغام ياليث ياذيب
عون الضعيف اللي همومه ادفَّه

لاجاك من جاته همومه محاضيب
تقبل به وتقفي سواة المهفَّه

ترقى به اللي عاليٍ شرق ومغيب
هي عادتك لاجاك منته تسفَّه

وتقدر اللي عارضه شامطه شيب
واخ الصغير بحاجته منت تنِفَّه

ومقدمٍ بالقوم اعدى واصاحيب
مع الامانه زدت صبراٍ وعفّه

تحسب لك العدوان بالفعل وتهيب
وتفتح مغاليق اذا صار حفََّه

هاذي فعولك طيبه مابها عيب
واصبحت مثل طويق والا بصفّه

هذا الصحيح بدون شك ولا ريب
قولٍ على برهان عيبٍ اضفَّه

يابنت ياللي تغار منها الرعابيب
بنت الحصان اللي فعوله تنفََّه

شومي لبن عيده عطيب المضاريب
خلي الردي كوبان وأعطي مقفَّه

قلته ولابغي منه خدمه وتنصيب
ماغير ذكر الطيب قاف على أفّه

هذاوانا منصور واجزمت ومصيب
بقولي وسلامي لبن عيده ازفَّه