ماعطيت الحب قبل آحب قيمه - سالم بن لجعان

ماعطيت الحب قبل آحب قيمه
ولا عطيت اهل الهوى أي اهتمامي

خالتك عيني وقلبي جاك غيمه
وارتوى بك عشق يومه كان ضامي

الهوى فوق الهوى سارج نسيمه
مرني وانا احسبه مثل الكرامي

اثرها قدحة شرار في هشيمه
نورت عتم المسا والجوف حامي

قلت احبك قلتها بنت يتيمه
ودها تلقى معك حضن وأسامي

مادريت ان كلمتي بك مستهيمه
في فمي دارت مثل عود البشامي

ولدت الكلمه ونا احروفي عقيمه
كبرت وصارت روايات وغرامي

فكت كفوف الحكي كف العزيمه
والنظر يمك نطق باقي كلامي

شفت لمحة ذل في عين الشكيمه
واختلف لون الورق في عود نامي

من كثر ما اسمع نصر حب وهزيمه
صرت احس ان شارع العشاق دامي

فان ذبحني صرت من يهوى غريمه
هو السهم وانا الهدف والحب رامي

وان عتقني ماتت عيوني ظليمه
يزرع نعاسي ويقتل في منامي

ولو نبشت سنين من عمري قديمه
طار سر العشق من تحت الركامي

وانتهت رحلة مرض روح سقيمه
عضها الكتمان من خوف الملامي

اول الجره لحبك مستقيمه
وآخر الجره ميولات وعدامي

ياحبيبي حبني لو فيك شيمه
إعرف إنك غايتي واكبر مرامي

جيتك امن البعد وطيوفك مقيمه
ودي ابني في ثرا قلبك خيامي

شوف ذود العشق في عدك وخيمه
ذي السنه توفي ثلاث وهي حيامي

شيب راسي بان واحلامي فطيمه
في هواك اللي بلغ حد الهيامي

الهيام اللي رفضت اعطيه قيمه
وقبل احبك ماحسبته من مقامي

حبني وان كان حبي لك جريمه
فقاضني عندي ووكلني محامي

والله ان اقسى ولو روحي عظيمه
واجعل سيوف الهوى تنهش عظامي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر