تاج الذنوب - سالم بن لجعان

استبيحك ياحرام الحكم واستاذن وقاري
لو جرح راسه طرف تاج الذنوب وسال دمه

الحكم للذنب هو مولاي يوم احتل داري
والمشاعر من كياني كلها تنساق يمه

انهك الحزب اليميني قوة الحزب اليساري
ومن امم الارض العريقه أخرجت للذنب أمه

ملت النفس احجيات القمع واعجوبة حصاري
لين ثارت بي وجات تسوقني من دون يمه

ومن على مينا الفضيله فمّي من القول عاري
لحظة والصمت عيّا للملا ينفك فمه

والاكيد اني موادع والرحيل آخر قراري
غرّب القارب وريح الشرق من خلفه تزمه

اعذريني يالمبادي واقبلي جل اعتذاري
ويش اسوي بالنقا لا طاح من عين المذمه

واعذريني يالنوايا واعذريني يادياري
اعذري من في ثراك يذوب دمعه فوق كمه

قام يغريني جمال الذنب لين اخلف مساري
وقمت اصلي فرض شوفه وانتما وجهه واتمه

في ملامح جادل الذنب ارتسم عدة مواري
فزت عزوم الشعور وطاحت كتوفن أشمه

اشهد انها جاذبية الارض والبعد المداري
مؤمن بسحر الجمال وكل ضلع فيه قمه

اقبلي لبيك ثم لبيك يا بردي وناري
شتتي الفكر الضعيف ولا يجي غيرك يلمه

ايه ضميني وسميني وردي لي اعتباري
لاتساويني بغيري ماني ابمن جا يضمه

شفتك وقمت اتبعك والطعم مجموعة اثاري
بايع نفسي عليك وعارف مافيك ذمه

اعشقك واموت فيك وكل مافيني انتحاري
في رضاك يموت قلب راس ماله بس همه

كيف وانتي الارض وانا في مدارك نجم ساري
طحت من عالي سما الاعجاب لاجل احظى بضمه

اغمسيني في ملذات الهوى طال انتظاري
واجعليني فيك غايه واجعلك عندي مهمه

بانتهك عرض الخيال بتمتمات وألف طاري
واشرب اكواب الوصايف وارتوي من كل جمه

جادلي وش يربط عيونك مع حد الشباري
نظرتك طعنة ذليل ساعة الضيقا تخمه

فيك اشوف اجمل مماتي وآخر عيوب احتضاري
واطهر تراب القبور الي علي كفك تدمه

وش حياتي وش مماتي دون ذنبك يا اندثاري
اقتلي ولد الحلال ولا تردك صيحة امه

وكان ودك تعرفي فرق انتصاري وانكساري
اظهري محرابك الي به ثنين من الائمه

صوتك الهادي تكسر في طريق البوح جاري
جيته وشلته من ارضك وانتشر بالدم سمه

والحقيقه جابني لك حب ماهوب اختياري
جيت بامر الذنب وأمر الذنب سيدي في متمه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر