نهاية الاحلام - مسفر الجعيد

فكرت والتفكير فكر ٍ بلا حد
والفكر والمعقول للناس غايه
فكرت في قصة حياتي على سرد
ما الله خلقني للعبث واللهايه
واللي خلقني من عدم صرت له عبد
يا جعل رب البيت يغفر خطايه
طلعت للدنيا صغير ٍ ومنحد
اصيح وابكي والبدايه بدايه
ومابين ضعف وضعف والعود يشتد
وضعف البدايه مقترن بالنهايه
ومن زحمة الدنيا ابا ارحل وابا اشد
بشد من دنياي محد ٍ معايه
ماتنفع الدنيا ولا مال ينعد
وزين العمل ينفع ودرب الهدايه
ونهاية الاحلام بالموت تنهد
وليت العشاء للدود هو منتهايه
لكن فيه حساب واعمال ترصد
اما نجحت وجنة الله جزايه
واللي سكن فيها سعيد ٍ مخلد
ولا خسرت ونارها مقتضايه
واللي سكن فيها تعيس ٍ ومُبعّد
عن رحمة الله في صحيح الروايه
هي منزل اللي طاع نفسه ولا صد
ومن طاع للشيطان راس الغوايه
والنار والجنه طريقين تمتد
هذا كلام الصدق ماهي دعايه
© 2024 - موقع الشعر