يامسا الخير

يا مسا الخير ياحّسن يوم واعز ليله
ليلةٍ تختلف ما هي بمثل الليالي

فضلها زاد عن كل الليال الفضيله
تلبس أحلى تواصيف البها والجمالي

يا مسا الخير يا جمع الوجيه النبيله
جعلكم كل عام بخير واعز حالي

فرحت العيد غايه والتواصل وسيله
والكرم والتكاتف من طبوع الرجالي

والعقول السليمه تصنع المستحيله
والنشاما عزيمتهم تهد الجبالي

وبعض الأعمال تشفي كل نفسٍ عليله
يحترمها البعيد ويحترمها الموالي

سدد الله خطاكم يا شباب القبيله
يا رجالٍ تواصوا وارخصوا كل غالي

شدوا الحيل ما حطوا عن الحيل حيله
معنوياتهم ترقا بهم للمعالي

حمَّلتهم شجاعتهم بحمله ثقيله
حملتٍ ثقلها يكسر ظهور الجمالي

كل واحد على الطيب ايتحدا زميله
واستعدوا ووفقهم عزيز الجلالي

هكذا يفعلون مدورين الجميله
من بغا الطيب يطلع له بروس الطوالي

بصمت البخل دايم فالكفوف البخيله
والكرم نورٍ أبيض في كرام السبالي

وانتم اولاد روق اهل الفعول الجزيله
كلبوكم بني عم وعمام وخوالي

في نحور العدا مثل السيوف الصقيله
وللقرابه كما الشرب القراح الزلالي

ودي اشيد بافعال الرجال الأصيله
واعترف بالحقيقه والحقيقه تقالي

كلمت الشكر للي جمَّعونا قليله
ما يسوِّي كماهم غير رجلٍ مثالي

علموني وانا دوني مسافه طويله
وجيت كلي فرح وسرور واشتاق بالي

مجتمعكم يشرِّفنا ولازم نجيله
مستحيل اعتذر لو اني احضر لحالي

سجلوني من الحضَّار زند وفتيله
بفقرت الشعر والماقف بحالي ومالي

والختام اطلب اللي كلنا نلتجي له
يصلح احوالنا ويدلنا للعدالي