عرش المحبه

في وسط قلبي منزل الغالين مثلك ياغرام
وأنتي على عرش المحبه مستضله فيته

الأوله في ناضري ياعشق أبوك المستهام
يامهجة الخفاق في يمناك جت ماريته

وش عاد بقيتي لغيرك من شعور ومن هيام
جسمي ومابي فدوتك من ناضره لاريته

محاجرك لافيضت بالدمع أشعر بإنقسام
أن شفت دمعك خاطري لك ياكثر ماويته

ياغلا من الخفاق ياوجه الغلا والأنسجام
الشعر في غيرك حكي ماجملت قافيته

يامرحبا بك في مقر الجود والناس الحشام
عدات ماهل المطر وأحيا الديار الميته

بشرى قدومك فرحتن كبرى لها قدر ومقام
فرحه تخط الشعر من فرحاتي المتبيته

لو مابقالي غير بسمه منك من عام لعام
تكفيني أعيش الأمل والهم ماحسب جيته

أراقبك من شوق قلبي لك وأخصك بإهتمام
وأعد وقتك وأزرع الأفراح وألغي سيته

تدرين ياوجه السعد والحب وإحساس الغرام
أن بوجودك قلبي الشفقان حاز أمنيته

لو يضحك العالم بأسره لي أشوف أنه عتام
وضحكة براءه منك تسوى العالم بكليته

اقول جعلك دوم فرحاتي وحبي والسلام
وجعلك مداد الشعر والهامه لي وحرفيته