أسري مع الذيب

اسري مع الذيب لامنه غفا الغافي
يوم ان خطوي الولد في الليل ما يسري

وأمشي على شف بالي وأظمن أهدافي
ومن مد لي شبر دونه ما نقص شبري

وليا هجرني المنام اوميت بلحافي
وأسرح مع الطير لامنه سرح بدري

وأضحك وأجامل ولو يلحقني خلافي
وأجحد على شان بعض الناس لاتدري

وإن كان جار الزمن وأصبح على جافي
لو ينقضي صبر غيري ما أنقضى صبري

ومهما تصير الليالي سود وأعجافي
أبقى على طيبتي والمرجله ذخري

وليا تعكر عليه جوي الصافي
وضاقت على الوسيعه وانكتم صدري

أسج رجلي واعدي كل مشرافي
ولا عاد أفكر بميلادي ولا هجري

وأجر صوتي وأغني وابدع القافي
وأصوغ الأبيات من فكري ومن شعري

ومادمت طيب على الدنيا ومتعافي
أبحمد الله في عسري وفي يسري

وعساني لوالديني بالوصل وافي
وأقوم بحقوقهم بالسر والجهري

وأخفض جناحي لهم وأصير خوافي
وأصبر على جورهم وأفديهم بعمري

والله لو إني أمشي لأجلهم حافي
مالي فضل لو أحججهم على ظهري

يارب تكفيهم من النار ياكافي
وتكتب لهم جنتك في ساعة الحشري

وياالله يامنزل طه والاحقافي
ترحمني برحمتك لا جيت في قبري

واختام الأبيات يالله سترك الضافي
يارب انا طالبك لا ينكشف ستري