ياجدي - خالد علي اليامي

واناظر شفت لك ذكرى بمجلس بيتنا المهجور
ذكرت ان الذكر نعمه عرفت ان الزمن دوار

سألت الضي عن وجهك تجاوب شرفة الديجور
تقول ارجائها راحل طهر او جمعها اطهار

اشوفك في ذرا صمتي حبيب المنزل المعمور
هنا لك بي نخل واقف كبر واستحصدت اثمار

هنا باقي* هنا تبقى* هنا بسأل عليك النور
واعانق لاجلك العتمه وبسأل عنك الاسحار

وبتساءل مع روحك مع انفاس الشقى مقهور
ياجدي تذكر الذكرى او انه خانك التذكار

ياجدي تذكر الملعب وتذكر ساقي المكسور
جبركسري وصرت امشي على سفح الالم جبار

ياجدي تذكره حلمي الى من قلت لك دكتور
وتذكر يومنا نلعب تحت شمس الضحى مقطار

ياجدي تذكر اشيائي وتذكر خالد الغندور
كبر واتغيرت حاله عشق سلمى وصار يغار

تولع بالحنين وصار لرياح الوله مجبور
تعلم صارلك شاعر يعانق زحمة الشعار

وله قافه وله حرفه وله ساحه وله جمهور
تقول ان الزمن دوار هذا هو حقيقه دار

ياجدي ماحصل حلمي كبرت ومالعبت الدور
وانا مامات بي عزمي ولو كان الامل منهار

تعلمت الصبرمنك عساه يبيح المحضور
تعلمت اكوي بصمته لسان احساسي المحتار

انا مانساك ياجدي مسكت اذني تمد الشور
وانا اذكر يوم تعطيني نصايح اوحكم في الدار

تعلم كيف تبني لك حفيدي بالغياب حضور
تعلم كيف تختار الصديق اليا ضميرك حار

تعلم كيف من صمتك تعبر للجلوس شعور
تعلم في ظلام الليل تاخذ لمعة الانوار

تعلم واسمع الحكمه اذا قالوا بعلمك نور
سمعت وطعت ياجدي رحمك الواحد القهار

ولو انك معي حاضرمع صدق السنين الجور
تهب رياحها ضيقه تلاعب بي يمين يسار

معاك الله ياجدي بحق الفاتحه والطور
عساك بجنته آمن ومن تحتك تسيل انهار

© 2024 - موقع الشعر