البر

لـ جمل المسردي، ، في غير مُحدد

البر - جمل المسردي

يلومني في البر راعي الحضاره
مايدري ان البر شربي وزادي

مناي لا من جيت خاطي زباره
بعيد من الازعاج والجو هادي

وحمست من بن اليماني خياره
واخذت فنجال من ام القنادي

وادوج وسط العشب واقطف ازهاره
واجر صوتي فوق روس المبادي

في خايعن ينعش بشوفة خضاره
فيها الخزامى ريحها ريح كادي

يرعى بها ملحا رفيعة فقاره
ريحة عبسها مثل ريح الزبادي

سنامها المفهوق ميزه وشاره
طويلة النسنوس سوادء سنادي

يسوقها يم المدوه سطاره
وتعجبك في درهمها للمنادي

في مركز النخبة تفوز بجداره
تخفق لها قلوب وتصفق الايادي

الوافية منزالها في الصداره
ما مثلها مع الحضر والبوادي

من دونها البارود يقدح شراره
دايم وراعيها بروحه يفادي

ما يحتميها كود راعي النعاره
مثل سعد لا حان قدح الزنادي

كريم سبلا والمراجل شعاره
طيب ولا اعند منه لا جا العنادي

من صلب ابوي وضاري بالشطاره
ماسك وصاة العود راعي الشدادي

حبيت ابين من ضميري عباره
واهيم بالاشعار في كل وادي

اطيب من المجلاس وسط العماره
ومقابل اللي ما وراهم سدادي

العالم اللي ينبش،ون الجحاره
اهل القلوب اللي غشاها السوادي

احسن لي ابعد عن وجيه الخساره
واصير عن بعض الوجيه انحيادي

واسج مع ربعن سواة النماره
الكل منهم مثل طير الهدادي

سوالفن معهم تساوي التجاره
وتجلي همومن تصطفق بالفؤادي

هذا منا قلبي وهذا اختياره
وهذا هوى بالي وغاية مرادي

واخير من طول الكلام اختصاره
ان اشهد ان البر ثالث عيادي

© 2024 - موقع الشعر