كرت العايله

الوقت .. كم ودّه أطوفك واخلّيك
واحيان انا ودّي مع الوقت .. طايفْك ..!

أسبق طيوفك وآتحرّى مواريك
ما نيب متشكك ولا نيب خايفْك ..!

مع ان ّ وصفك عن جميع المماليك
في هيبتك .. في رقّتك .. في طرايفْك

أفخم .. وأرقى .. يا حلو من يحاليك ؟!
وحْكايتك مثل الشهد من شفايفْك

تدري وش احلى سالفه من معاليك ..؟!
اللي تسولف عنْك .. تحكي وصايفْك ..!

وتدري وش اكبر أمنيه عند مغليك ..؟!
لا صار كرت العايله فيه ضايفْك ..!

وتدري وش اللي يفتخر به محاكيك ..؟!
إنّي أنا والشعْر .. أغلى ولايفْك ..!

نْطيع شورك لجْل فالوقت نرضيك
نكتبْك .. تكتبنا .. غدينا صحايفْك ..!

دام بْسما فكري كثيره معانيك
ويا كثْر ما اسمّي بفكري .. وضايفْك

مزنك .. ينابيعك .. ثمرْك وْ أغانيك
جنّة أحبك نار .. لو كنت عايفْك

مدينتك وورودها .. يوم الاقيك
آشوفها لو كان ما نيب شايفْك ..!

ومدينتي وبحورها .. هي شواطيك
تبدي حسايف خاطري مع ْ حسايفْك ..!

أحيان .. بعض احيان اطوفك مخليك
واحيان .. كل احيان بآمرّ طايفْك ..!