ضحية صمت

لوكان ودي ماجعلتك تشمين
حتى الهواء ياغايتي في غيابي
ولوكان ودي ماجعلتك تشوفين
غيري ولاتفتح يدك غير بابي
ونتي ونا في تالي الوقت قلبين
شد الغلا فيها عظيم الركابي
انا احبك فوق ماانتي تحبين
كثر الغلا يزيد نسبة عتابي
ون كان وعدك ماتغير لهالحين
ولاتاثر من تغير خطابي
بانك معي دايم على العسر واللين
ونك حلا تسيل قربه لعابي
ونك تحبيني على الزين والشين
وفي مستوى قربك يطيب اقترابي
زرعت لك في وسط روحي بساتين
واسقيتها الكادي وشربة عذابي
ونزفت لك في قلب نايف شرايين
تعال طال الهم ثم التوابي
تعال شفني في جموع المصلين
احيان تاخذني ولوقلت مابي
ياسيد البيض وعميد المزايين
يانكهة اللذة برشفة شرابي
انا بقوم ادعي وقولي لي امين
وبقول يارب ارحم اللي مصابي
بالحب وجروح الغلا كالسكاكين
في داخلي مغروستن للنصابي
شوفي غلاك اللي حرقني بنارين
نار الجفااللي ولعت في شبابي
ونارن تشب من الضلوع الدخاخين
ولعتها حتى رقت للسحابي
وامطر سحاب الغيث فوق البساتين
ونيران حبي ماطفت ياحسابي
احسب لها ياصاحبي زين مازين
في غربة افكاري يعيش اغترابي
شاعر واصدق مثل الأطفال سالين
وماهزت أمتوني رماح وحرابي
نفسي خذت عهدي لان العهد دين
ماصك باب الين افك الف بابي
بنعيم كل الناس حتى المجانين
ومن حيرتي مقلوب لبسي ثيابي
والله وربي لو سواتي تعانين
كان اعتزلتي الناس راي الصوابي
لكن انا ربي معي لاتخافين
الراس من زود التفاكير شابي
انا شربت من الالم حق عامين
وتعبت من اقدامي رجوم الهضابي
انا تعلمت اعرف الصوت من وين ؟
واعرف ايابي قبل اقرر ذهابي
كل وقت له دوله وناس وسلاطين
وكل حرف يزها لا كتب في كتابي
ياوجد حالي وجد من لاعه البين
وجد الكسير اللي ترجا المطابي
وجد البري لا انحط بين المساجين
وضاقت بعينه واسعات الرحابي
تدرين وش ودي من الوقت هالحين
ويجلى عن النفس انتشار الضبابي
مابي من الدنيا انا غير شيئين
وتسعد حياتي واخر اللي بقابي
لامن شفالي ربي امي وتدرين
اني سؤال ومالقيت الجوابي
وثاني طلب ودي أموت وتموتين
في وقت واحد والقبر مايهابي
ونتجاور بقبرين في روح قلبين
ونبعث سوا يوم النشر والحسابي
أنا ضحية صمت كانك تحسين
يارب لاتحرم غلاه الرجا بي