ماهمني

برقا على متن السحايب وعدي
لين الطموح أوصله للمجرات

ماهمنى منهو وقف يوم ضدي
بمشى بدربى لو تطول المسافات

ما هو بقدي لو بغاها تحدي
يبطي وهو ما ذاق طعم الملذات

مثله ترى ما هو غريمي وندي
والياس ماله في حياتي مجالات

أطوع اظروف الليالى بجهدي
ورفا خماله ورتكي للثقيلات

عساه يفهم بالمقابيل قصدي
مادام ماله بالمراجل مروات

انا ورثت الطيب من ساس جدي
والطيب خير من الردي كل الاوقات

وان قاله الله يصبح الراي عندي
واخوض بعزومي كبار الصعيبات

ثابت انا الخطوه ولا هو بقدي
عزيز نفس وغايتي عزة الذات

والقاف اصيغه حسب كيفي وودي
وجزل المعاني جبتها وسط الابيات

ماسال دمعي من قهر فوق خدي
ولا شكيت امن القهر والمضرات

الهم مهما زاد ما باح سدي
اضحك وخبى ما بقلبى من اهات

من باعنى يبشر ببعدي وصدي
مانى من اللى يرتضى بالمذلات

ما اشحذ انا الهمه ولا مد يدي
الرجل عقله يسنده بالطويلات

ياكثر ما عدي وعدي وعدي
والصعب دايم في عيوني سهالات

مير البلا وصلت انا اليوم حدي
والحر يرقى فى جميع المجالات