"ثـــامـــن أعــجـــوبــه " مـحـمـد بـن راشـد آل مـكـتـوم

من ديار السلام اللي بها طيور السلام
تحوممن كويت المحبه دار أبو ناصر فخر دسمان

سلام الله يا "محمد يا بن راشد يا بن مكتوم"
"يا بوراشد وابو ماجد وابو أحمد وابو حمدان"

يابو "مكتوم" وأخوانه يا قرم(ن) من تحته قروم
يا فارس يجمع بدمه نسل (مكتوم) و(نهيان )

طويل العمر تسمحلي ؟!أبحكي للعلوم علوم
برغم ان الحكي يقصر وتقصر دونك القيفان

تعلّم من فكر (راشد أبوه) و(زايد المرحوم)
ونمى شيخ(ن) سبق فكره عصور وهالزمان ازمان

وحس دبي تستاهل مكان الها وسط النجوم
وقال : ( إن ربي أحياني.. لوصلها هذاك الشان )

محمد فكّر وخطّط ونفّذ خطته بعزوم
ما همه قولة مشكّك ولا حاسد ولا غيران

من القاموس اعدائه: (محال) و(صعبه) و(ماروم)
ويحب (إعمار) و(وأنجزنا) و(أنشأنا) وبدا البنيان

قطار التنميه ماشي وبنزينه امل وعزوم
وأساس التنميه كلها تمحوَر في فكر الإنسان

تطوّر..صحه وتعليم .. وثقافات وأدب وفنون
نشاطات ولقاءات وفنون(ن ) تثري الأذهان

مشاريع.. وعمارات .. ومباني .. تنطحلها غيوم
على أشكال النخل جزر(ن) وشي تكذبه الأعيان

دُبَيُ(ن) دانة الدنيا .. حقيقة وينها الحلوم ؟؟!!
مادام ان ربي رازقها بشيخ(ن) نكه "كحيلان

كثر ما يعشق العليا .. يضيق لشوفة المظلوم
ولا يرضى أحد ظالم ولا داين ولا ديّان

يمينه يا كثر ما اعطت .. وفكّت ضيقة المهموم
معودها على الفزعه .. وعلى الطيب وعلى الإحسان

نشوف (محمد ) أسطوره .. هذاك الحاكم الزيزوم
هذاك الشاعر الفارس نشوفه للفخر عنوان

((ودبي اللي غدت تاسع عجايب هالزمان اليوم
سببها ثامن أعجوبه .. سمو المجد أبو حمدان ))