إلى هنا وانتهينا

إلى هنا وانتهينا صدق يالغالي
ما دامك اليوم ما انت الغالي الأوّل

عيّبت نظرة هواك بصوتك العالي
أسمعك وأصدّ عنك شويّ متهوّل

شف كمّ حاولت لجل احييك في بالي
وتموت في وسط عيني دمع وتحوّل

وأقول يمكن تحسّ وتفهم أقوالي
وأثرك على ما انت فيه وشكلك مطوّل

منوّل ألقاك في شعري وموّالي
والحين لا .. فرق بين الحين ومنوّل

لا تتصل بي ولا تسأل عن أحوالي
إيميلي مبنّد ... وجوّالي محوّل

وإن مرّك الشوق يا همّي وغربالي
دوّر بالأبيات منّي بيتٍ مقوّل

أحسن لي أروح في حالي وبلحالي
وأعيش باقي حياتي عنك متجوّل

إن قلت ناسيك وإلا قلت في بالي
يا أوّل حبيبٍ بدرب الحب متسوّل