عاش المريض ومات عنه طبيبه - مسلم الحويطي

وشفيك ياوجه الاجاويد حزنان
والله مانرضى عليك الغليبه

الموت حق ولاسلم منه انسان
لكن فرقى اللي توده صعيبه

لاتغرك الدنيا ترى مالها امان
فيها المثايل والدروس العجيبه

خذمنها العبره الى سرت بلشان
واسأل رجاجيل العقول اللبيبه

وزّن امورك كل شياً بميزان
وميز شعرها من لطيف السبيبه

اصبر على حملك ولو عشرة اطنان
شكوى لغير الله ماهي إمصيبه

ياما بكينا فراق ابات واخوان
وياما العيون الدمع هلت سكيبه

العام كنا نقابل فلان وفلان
واليوم عنا طولون المغيبه

اقفوا بهم في وسط لفات الاكفان
ثم اختفوا تحت الثرى والتريبه

تكره حلاوتها وترخص بالاثمان
لالاح فيك الشيب عقب الشبيبه

الموت ماوفر صحيح(ن)ومرضان
عاش المريض ومات عنه طبيبه

© 2024 - موقع الشعر