إن كان ماقالوا يفك التوالي

يالله يارب ّ ٍ عليم ٍ بحالي
ياعالم ٍ عدّ المخاليق بحساب

تنظر بحالي ياعزيز الجلالي
ياحامي أركان الحرم من ورا الباب

ياحيسفي ياصقر ياماجرالي
محدن حسبلي تالي العمر بحساب

ماكن إلي يوم ٍ خلاف التوالي
نهار يبس الريق يوم النّسم ذاب

إليا تقوّدنا بنات العوالي
بوسوق عيرات ٍ من القفل عصّاب

إمّا نصينا عن ولاوعالي
ولا تنصينا ديار ابن مشهاب

بقفايهنّه مانعد الليالي
وإقبالهن عجلات من خوف الاطلاب

ياما خذينا الحق والحق غالي
وياماعطينا الحق والحق غصّاب

ويا مصبرنا تحت شد الرحالي
وياما تصيعبنا وزدنا بالاصعاب

ياعيني اللي للقطر ماتخالي
إليا اختلف عن قطرها كل نصّاب

ياعنك ماجا فعلها فالموالي
ولا قط دنّت في قرايبها الاسباب

الاّ ليا جانا النقيلي يشالي
ثم جا للحرب موقد وشبّاب

ولاّ إليا ماريعن العمالي
وجانا البرى مردود من يم الاجناب

يازين مصباحي وراهم لحالي
بمسلّبن يغدي دم الجوف صبّاب

مضرابها سير النحر والكحالي
إمّا انثنى ولا يدعثر بالاعطاب

كم مرقما ً بين الحريبين خالي
كلّن يباه وعنه الاجناب هيّاب

ترعاه قطعان ٍ عليهن يلالي
المطرقين اللي على جرد الارقاب

إليا لقينا نشرها بالمفالي
قلطلها اللي ضاري ٍ بأخذ الاوجاب

ولحقوا هل البل فوق مثل السيالي
وجونا وجيناهم وجات أم غصّاب

ولحقوا عليهن مهملين الحبالي
والمال زاعنّه عريبات الانساب

وتواجهت بمكرمين السبالي
والخيل من كزّ المغاليب هرّاب

نقفي بهن وردهنّه عجالي
يردون حوض الموت ماعنه مجناب

سيلوا بني عمي وسيلو خوالي
ليا يبست القربه وتال النسم ذاب

إن كان ماقالوا يفك التوالي
يقطعك ياهرج ٍ ليا قيل ماصاب