البارحه والحزن يجري بالحشا مجرى الغدير
عزيت نفسي من خطايا الناس يوم افطن لها
واقلبي الي كل يوم يلوع به همن يجير
مليت ياقلبي وانا اصفح للخلايق غلها
ماعاد تنفعني الجمايل لو تجملت الكثير
طحت بمحابيل الظروف القاسيه وبذلها
اتعبت ساقي مادريت إن الجبل دربه عسير
ياعل رجلي ماتثنى في طلوعه علها
ماني على ماقيل طفلن في بداياته صغير
لو قلت له وش يجرحك شفت الدموع يهلها
عمري مضى ياللأسف امير في عالم حقير
دمحت زلات الرخوم الي علي تزلها
واليوم من فيض الندم جريت موال الضرير
تلتني الاقدار معها ماقدرت اتلها
كبدي يولع وسطها من لاهب الحرقه سعير
حتى الحبيب الي ذخرته بالوصل مابلها
مليت اجامل واقعي بإحساس مقطوع النظير
وسيوف عدواني بوجهي كل يوم تسلها
وانا سلايل مفحمين الخيل من نسلن ندير
نسل الحروب الفيه الي محتمي في ضلها
شديت عزمي واول الفرسان مايرجع اخير
يحل صعبات الامور ان كان طول حلها
القيض مايرحم ضعيفن من لهيبه يستجير
والليل ضاع بضلمته راعي العوارف كلها
ياقلب لايطري عليك الهم ثم تصبح كسير
خل الهموم الي ترفك بالمواجع خلها
نعيش بالدنيا كذا من دون تحديد المصير
والله يعلم بالخفايا دقها مع جلها
مافات مايرجع وانا مما جرالي مستخير
اخذت عبره من حياتن فايته بفطن لها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين