قالو رفيقك معه دورات علميّه - بجاد البقمـي

قالو رفيقك معه دورات علميّه
قلت ايه فالمرجله عنده مية دوره

والطيب له فيه دوراتن عموميّه
عند العوارف على الاقذال منشوره

والمعرفه ماخذٍن فيها النجوميّه
ماهي نجومية اهل الفن والكوره

وعنده حميّا لاجيته خص بدعيّه
يفزع معك في لزومك قدر ميسوره

ومن قومٍ فعولهم ماهيب مخفيّه
اللابه اللي بوقت الضيق مخبوره

اليا نخاهم صويبٍ تشلع دميّه
لكل منهم يشوش ويفقد شعوره

جوه متناخين ركابه ورجليّه
بمصقلاتٍ لصلب الراس مذخوره

تلقى الجماجم براس الحيد مرميّه
وايمان الاعدا هل الطالات مبتوره

بدارٍ زهوها بحد السيف محميّه
يوم القبايل في وقت الحرب وشروره

حامينها من سلاطينٍ شفاويّه
فالقصه اللي على الاشهاد مذكوره

يوم ان الاتراك جونا عندهم نيّه
يبغون دارٍ على العدوان منصوره

جونا بالازلام وكبار الزكرتيّه
.والخطه اللي على لوحه وصبوره

وجونا بقيّاد واسطول وبشّوجيّه
وجونا بمدفع ومدفعجي وبابوره

وقاموعليهم بني عمٍن فداويّه
الكل منهم يبيع الروح مكسوره

بسيوفٍ رهاف ورماحٍ رهاويّه
مضرابها فالعدو في ماسطت زوره

مافيه خطه ولارسمه هجوميّه
لا قدم قدم لا وانا اخو غندوره

لين استذل الظلوم اللي هقاويّه
قداّم ضرب القنا والسيف مغروره

وراحوثلاثه ثلاثه بالثبوتيّه
.ثلثٍ ذبح في شعيب سليم وجحوره

وثلثنٍ مصوب خفق عليه حنديّه
تكسر عليه الجناح وتكمل الدوره

والثلث الاخر طفق كلحٍ شفاويّه
انحاش خلى بوابيره وطنبوره

اماري بلابتي حماّية الهيّه
وافاخر بفعلهم في راس مجدوره

واليا تنومس حديهم مدحته ليّه
افرح لابن عمي ليا طاب مذكوره

واشوش له وانفعل لازان طاريّه
وارفع به الراس لامنه بدى نوره

والله لو ان القمر والشمس بيديّه
لاقسّمه بينهم والنفس مسروره

ان قلت وازع رجالٍ نارهم حيّه
سقم المعادي لامنّه فاحت قدوره

يبشر بماصٍ حمر من بطن هجفيّه
هجفيةٍ من دم الشيخان مبروره

حديدها السمك مسبوكٍ بكرسيّه
تودع صليب العظم تسعين شعثوره

رجالهم ينثني دون الرداوية
.وليا نخيته بجده غاب عن طوره

والامحاميد ضلعٍ راهي الفيّه
..من يزبنه مايجيه الخوف في غوره

على المعادي لامنه زاد في غيّه
.فيهم نعاره وبطشة كف واجسوره

ميقافهم صف في يومٍ عزاويّه
يجي لها فالفضا زعزاعه وثوره

لافرق مابينهم في روحه وجيّه
في كل شتى البقاع بكل معموره

ولو انتحو كل منهم راح فنحيّه
وقت الرخا والعطى والخير وايسوره

يقفي وعينه لابن عمه شقاويه
يلد فيه النظر في يسر واعسوره

حتى لياحس واحدهم بحسيّّه
.تلقاهم امتونه وذرعانه وسوره

ياحي ربعٍ مواقفهم بطوليه
في صفحة المجد والتاريخ محفوره

ياحي فعل ٍيشوق العين ياحيه
ابني من القاف له قبه ومقصوره

© 2024 - موقع الشعر