هذا قراري

لـ غير معروف، ، بواسطة غادة العلوي، في غير مُحدد

هذا قراري - غير معروف

ياويش يجبر خاطري بعد فرقاك
إلاَّ القصيد يبوح للكون ناري

المشكلة ماهي بواشلون أبنساك
واشلون يقوى الحب ياخذ بثاري

وانت الذي بالروح حبك وسكناك
بالدوم ذكرك في سماالشوق ساري

دقيت بابي وأذكره يوم شفناك
قلبي وانا وافراحنا بإختياري

لبيت قلبك يوم مديت يمناك
وأرخصت لك عمري وكامل مداري

سبحان من بين المخاليق سمَّاك
غاية مرام القلب حبك شعاري

واليوم قلبك باع من كان يهواك
قلبٍٍ يصونك لين وقت احتضاري

يا للأسف ما صنت حبي ولا جاك
نفحة وفا من بعضي اللي تماري

صامت عيوني عن هوى الغير لرضاك
يا شمس زانت وأصبح الليل عاري

ياليت بايدي أمحي الأمس وأنساك
دامك زرعت الشوك بأرضي وداري

العلم جالك بالقصيد وتعدَّاك
ما ينهزم صرحي بحشمة وقاري

والعز أصلي لي طعنته بجفواك
والجود نبعي والكرامة خماري

لا قلت أحبك ماقصدي أكسب رضاك
ولا أنتظر قلبك يرد اعتباري

لأن الضمير اللي حلف دوم يفداك
ما باع قلبٍ له الدوم شاري

هذا قرارك تجرح الناس بخطاك
واليوم أنا دوَّنت بإيدي قراري

ماعاد باقي شي يا صاح يبغاك
ولا عاد باقي بالحشاأي طاري

هذي نصيحة قلب مااظن ينساك
يرجي لكم خيرٍعلى الدوم جاري

حظٍ معاك اليوم ما دام وياك
وباكر دموع الحب تاخذ بثاري

© 2024 - موقع الشعر