ياليل سلم لي على كل غافي...
وعلى المريح اللي من الهم مرتاح

ياليل وجهك يااسود الوجه طافي...
وعيا غلق صدري على كل مفتاح

ياليل وجهك برد والقلب دافي...
وماعندي الا دلتي والف مسباح

سهرتك البارح وانا اقول كافي...
يوم ان نصك راح والنص ماراح

هاجوس يثبت لي وهاجوس نافي...
وهاجوس عرضني على كل ملفاح

امشي على تكشير الايام حافي...
واستقبل بصدري قسى شلف ورماح

اسقيت عطشان الوله كل صافي...
واسقاني العطشان سيفين وجراح

خطاي جيت بعالم الغدر وافي...
ياليتني ياليل ماجيت مزاح

وطاردت لعيون الوفا كل جافي...
لين اكتشفت ان الوفا مابه ارباح

ياليل مايخفاك ياليل خافي...
عن قصة اللي عاش بالبيد نزاح

لو الليالي يااسود الوجه تافي...
ماشفت دمعي من على وجنتي ساح

انا الفقير اللي عشقت اعتكافي...
محرابي البيدا ولا بيدي سلاح

اجابه وحوش الخلا في عفافي...
لامن قريت (( الناس )) سكنت الارواح

سجادتي تنهيد يروي جفافي...
والدمع يبرد واهج الصدر لافاح

ولامال وقتي قلت يالله عوافي...
يالله سترك تستر السد لا باح

ذل الزمان الصلف قلب السنافي...
لين استجاب بدمعته كل نواح

قام ايتنطح بالنظر كل لافي...
يخيل له برقٍ لو البرق مالاح

طاف الرجوم النايفه والمرافي...
وجاب المدينه يتًبع صمت الالواح

عذر الشوارع (( ايه يمكن توافي ))...
وعذره (( ترى درب الهوى موت ذباح))

دربٍ مشيته وآخر الدرب نافي...
ونهايته تاقف على (( ديرة اشباح ))

يالله انا سجلت خط اعترافي...
كذا غرق في موج الاوهام ملاح

خلقتني وافي واباموت وافي...
وياليل سلم لي على كل مرتاح

شعر: عبدالله الدواس

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر