راوية

لـ لفى الهفتاء، ، في غير مُحدد

راوية - لفى الهفتاء

يا راوية والنوى أصعب ظروف الهوى
صحيح وإلّا أنا غلطان يا راوية ؟

كم لك تقولين يالله لا تجيب النوى
ويبطي عليّ الوصل وأقول وش ناوية؟

وإن قلتي أضماك بهجة وأنت تضمى جوى
نبرة عتب ليت نبرات العتب كاوية

ما كان متنا سوى ولا حيينا سوى
ولا كان ذاك الهوى واقف على الهاوية

نهار قال انتهينا قلت ما لك لوى
حتى سقينا مشاعر طولّت خاوية

ومن كان دائه حبيبه من يكون الدوا؟
ردّي على كلمةٍ في مسمعك داوية

أحاول أنسى كلام العام فيما حوى
وأنظر إلى العام هذا من كذا زاوية

لعيون ثوبٍ من الديباج يوم انطوى
على غصونٍ بتربة راوية راوية

وإلا هلالٍ على بدر الجبين إلتوى
وأغاض نجمات في ليل الشعر ضاوية

ولقيت بأن الهوى لأهل الهوى لا قوى
لا بدّ ما تنقطع به شعْرة معاوية

وأنتي تقولين كلن به شبع وارتوى
وأقول أصابع يدَك ما هي بمتساوية

وأكبر دليل إن قلبي من نواك انكوى
جعلك قويّة ومثلك بالنوى قاوية

وأنا طويت القلوب اللي بلا مستوى
يوم الهوى دور شاعر تتبعه غاوية

© 2024 - موقع الشعر