خلاص ارحل

يا صاحبي لا تحاول تفرض اِنكارك
تراك مخطي على اللي دوم تشقيها

مخطي ومخطي ومخطي / لعنبو دارك
وتقول: إنّ الخطا من صنع اياديها

مليت انا يالرِّدي من كثرة اعذارك
يا شِين طبعك قويت انك تخطِّيها

الله حسيبك على ظلمك وإصرارك
وشلون يسمحلك شعورك تبكّيها

تعال / لا تستخف وتصرف اَنظارك
لا تحسب اني في هالمرة بعدِّيها

لا شك إنّ الخطا يستوجب اِنذارك
واكيد كلمة (أنا آسف) تكفّيها

وبعض الخطا ما تفيده روعة اَشعارك
حتى لو انك بمال الكون تغريها

مجبور تندم تراني قاصد اِجبارك
يمكن بلحظة ندم تقدر تنسِّّيها

لابد يا صاحبي تهدم لها اسوارك
خلي الغرور اللي في طبعك وحاكيها

أرجوك عجِّّل وحاول تعلن اقرارك
إن كنت بايع (خلاص ارحل) وخليها

ياما تحملتك وخانتني أفكارك
لكن من اليوم انا واللهِ شاريها

اعذرني يا صاحبي أنهيت مشوارك
تراني رايح (بدونك) لجل اراضيها

روح ابتعد يالردِّي واتحمل اوزارك
إنت اللي مثلك حرام انه يلاقيها

خلاص ما لك وجود ألغيت أدوارك
وابدلتك (بصاحبٍ) ثاني يهنيها

صدقني صعب اننا بالحب نتشارك
إنتَ خسيس وأنا اللي ميتٍ فيها