يابني خالد ترا الدعوه حميـــــهـ ـ ـ ـ - فهد بن دعيرم

ياهجوسي هبلي بيوتن جزايل
هبلي جزال الحروف اليعربيه

هبلي المعنى وجزلات المثايل
ماقفي يطلب من الجزله نديه

مرحبا في مرحبا تفرش زلايل
ومرحبا في مرحبا تنقا نقيه

مرحبا في مرحبا تبري علايل
مرحبا في مرحبا ند وعذيه

يابني عمي وانا واقف واخايل
بالوجيه الله عطاكم قابليه

ياشموخ المجد ياروس الاوايل
ياسلاطين الرجال الاوليه

مرحبا في مرحبا ياهل الجمايل
حقكم اكبر من المرحب ثنيه

دامكم بالمجد ياروس الحمايل
تكتسون المجد بالنفس الرضيه

عزكم ياعزاز ماجابه جدايل
من قديم المرهفات الصيرميه

ماضي وحاضر ووقفات وصمايل
ماذكر من بيننا نفس شقيه

لانتخينا فوق قبات الاصايل
رحمتن بالضد نكسيه المنيه

وحالنا من حال باقين القبايل
كل من عنده على ربعه حميه

في ذرا الدوله تجمعنا خصايل
بالولاء كل القبايل منتميه

تحت حكم العدل والفعل المهايل
دارنا بالامن ياربعي هنيه

دام ابومتعب على الديره وقايل
والله ان الخير تكسبه الرعيه

دارنا ناقف لها وقفت هوايل
مارضينه للجنوب ابسط اذيه

نلتحق في جشيها سرب وفصايل
دون ديرتنا مواقفنا حضيه

في حرسها عيالنا قروم وشكايل
وجيشها فيها من ربوعي سريه

والدفاع وجوها فينا طلايل
والبحر بسطولها منا زهيه

سور ديرتنا نوقفله اوايل
عن تفاكير العقول الجاهليه

نحتمي للدار والمنشى مخايل
والولاء منى مخاييل رعديه

هبس تذكر بالحساء الها نزايل
حيزا حيزا والعزاوي خالديه

الحبارى تدرج بليل وقوايل
محتمين البيض يالروس القويه

قلت قولي والمعاني ماتمايل
يابني خالد ترا الدعوه حميه

كلنا نبقى على اسم وسلايل
جدنا خالد ولامجاده بقيه

© 2024 - موقع الشعر