كوكب الغمت

تلومني وأقول لك حق لو لمت
حتى ولو ماكان لك حق ضدي

لمني على كيفك وأنا بلزم الصمت
أصلا انا مجنون لو قمت أردي

كمل ملامك لي ولو شفتني قمت
أقوم أغيظك لأجل ضدي تشدي

لا تحسب إني من كلامك تألمت
لا والذي سواك ماأهتز جلدي

لمني وعاتبني وسو الذي رمت
لكن ترى تبطي بلا أخذ تدي

أقاطعك وأقول لك لو تكرمت
وفر كلامك صدق ماعاد يجدي

الحب بلوى ليت أنا ماتعلمت
لكن تعلمته ولا بحت سدي

جيت الهوى جاهل ولا قد تفطمت
وش حيلتي لاصار من قبل رشدي

أذوب في بدوي عليه الكسا سمت
وأموت لا شفته لبس ثوب وردي

ولا ان حصل نفنوف بحري تحطمت
والبرقع اللي يلبس الزين نجدي

عايش معاه الحب عامين ما نمت
أبات طول الليل ساهر لوحدي

يازينها عامين في ذا الحلو همت
البرد عشته قيظ والقيظ بردي

الليل فيه الهمس لامن تولمت
يعدل مزاج القلب بعد التردي

أحسّني فوق الثريا تزعمت
وهو على الجوزاء أرتخا واستعدي

وبيني وبينه جسر وقطار صممت
أجيه ولا هو يجيني ونبدي

والناس هذي فأرضها كوكب الغمت
وأنا بعيد وعند من فت كبدي