(( وآآآآآو ))

خَذ شهاده بعد ما تعلّم
والأهل قاموا يهنّونه

وللوظيفه سار بيقدّم
هالولد يبغي يشغلونه

دش على المسؤول ثم سلّم
وابتدى يتكلّم بهونه

قال: أنا ييتك وأريد أخدم
الوطن وآرجّع ديونه

أبغي أعمل وأكسب الدرهم
من وظيفه تكون مضمونه

لأجل أبني بيت وآعزّم
وآتزوّج بنت مزيونه

صَد له المسؤول وتجهّم
مندهش ومطرطر عيونه

وابتدأ المسؤول يتكلّم
وبصراحه باح مكنونه

قال هالأوراق ما تلزم
والشهاده ما لها مونه

اللّي عنده واسطه يغنم
ذلك بسرعه يعَينونه

واللّي ما عنده فلا يقدّم
الطلب لأنهم بيرمونه

انصدم هالشاب وتألّم
من كلامٍ له يقولونه

ثم طلع من غير ما يسلّم
مبتهت والنفس مغبونه

وابتدأ يفكّر ويتندّم
بعد ما قد خابت ظنونه

في المدارس كان يتعلّم
يوم هو بعده يربّونه

ويوم خلّص كان متعشّم
انهم بشغله يوظفونه

وانصدم بالواقع المؤلم
حرف (واوٍ) واقفٍ دونه