عساالسحاب اللي نشا اليوم نوه
اللي نشا مزنه جنوب و شمالي

يزتاد نشوه و يتكاثف علوه
حتى يتشابك بالسما بالخيالي

ويسوقه الشرقي ولاكثر نزوه
يعطيه عن فجوة مزونه مجالي

وقت النهار يلطف اليوم جوه
والليل برقه نور سود الليالي

يسري وبرقه يكشف الليل ضوه
وصوت رعده حرب(ن)عنيف القتالي

وبرقه يشب من أوله لا تلوه
وتعكس سنا ضوه سيول الدحالي

و لا يشمله سكن هواءه وهدوه
حتى مزونه تاصل أم الصخالي

ويمطر سحابه في هدوا وعنوه
وبله يغطي شامخات الجبالي

حتى الدهر يجلا عن الارض سؤه
ويحيي الهشيم اللي من الدهر بالي

وارضه يزيد بجوفها الما غنوه
يعلها بالماء القراح الزلالي

حتى يجي بغصون طلحه طروه
ويصير غابه مكتسيها الجمالي

بدارن غلاه اللي مضى زاد توه
وارست غلاه وحبها اول وتالي

دار الغلا دار الصبا والمروه
دار الشباب وصافيات الليالي

والصاحب اللي قلت ماتريد سوه
وفتحت له من كل صوب المجالي

وقلت له دفتر سود الايام طوه
وقدمت له روحي وغالي حلالي

وطلبت منه بتالي العمر خوه
بس هو والا لغير مامر بالي

ماهو خفا جيته بعزم وجروه
ماحدن عنه غيري من الناس سالي

ماحس ابه من جور الايام جوه
في ضامري يفوح فوح الدلالي

وغلاه في روحي تزايد غلوه
ماهو بامني من عزيز الجلالي

لو الغلا لنفس حسبت عدوه
كان انتها في سلم والا قتالي

مير الغلا مافيه حيله وقوه
وراع الغلا مهما يسويه غالي


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر