مغلق تلفونه

"أحسب إن البشر مثلي" بطيبي والوفاء ظلّي
وأثاري الناس تضحك لي وهي بالجوف مغبونه

أمدّ الطيب بوصالي وأشدّ الحبل وأهلّي
وأثاري صاحبي يقطع حبال الوصل بسنونه

أنا جيته وفاء صادق وبالإخلاص متحّلي
وهو يقفي وأرقع له ثياب أعذار مردونه

بغيته يتصل فينا يعلمنا خطا زلّي
على المرسال نرسل له وهو يغلق تلفونه

بعد ما طق لي صدره وقال أفديك انا كلّي
وبرخص حالي ومالي وأشيل الجرح وطعونه

أثاري بعدها قفى حلايا البوم متخلّي
وانا كنت أحسبه حراً أصيل يفرق بلونه

حشى ما أرجيه حال ومال ولاني شخص متسلّي
أبي لا غاب أدق أنشد ب كيف الحال وشلونه ؟

وأدور صاحباً وافي يعرف الطيب ويدلّي
على دلة وفاء نشرب دلال الصدق موزونه

وانا ماني بتابع مقفي صدّ وتنكلّي
ولاني براجيه صاحب يصك الباب من دونه

وكان انه بغى فرقاي ولابه من خطأ زلّي
ف انا بنت العبيه قد وسمْت الذيب بعيونه