يفز قلبي كل ما شفت هالثوب - اسيرة الصمت

يفز قلبي كل ما شفت هالثوب
ثوب الغرام اللي سجله طويته

ياليتني عن حب صاحبْه اتوب
وليت دمعي ينتهي لا نهيته

خلٍ علي أصبح مقدر ومكتوب
مكتوب في نبضي عرفت وقريته

هذا الهوى كيفي مزاجي والاسلوب
وجروح قلبي غايرة لا شكيته

لا أقبل سواد الليل ونيت مسحوب
وين الحبيب اللي بقلبي فديته؟!

أغليه يدري متيمة فيه واذوب
شربت من كاس الغرام وسقيته

صبيت له من دلة الحب مشروب
لا هو رواني بحبه ولا رويته

أذكره مع نسمة وهبات الهبوب
ساكن حشاي بداخل القلب بيته

© 2024 - موقع الشعر