ماانت بكفو - بنت قبيلتها

مانت بكفو من يحتمي فيك يافلان
ولا انتا قد الحمل ياللي تشيله

لاتحسب انك مع هل الطيب لك شان
لك فالعلوم علوم ماهي جميله

لاجنبوا دربك طويلين الايمان
اعرف ترا هامتك ماهي طويله

عشنا وشفنا فالعرب كل الالوان
احدن شجاع وواحدن عزتي له

واحدن تبٌين طيب فعلك ولابان
واحدن من فعوله تبي تنحني له

واحدن فقير وفي عطاياه ذيبان
واحدن امير وله عطايا بخيله

واحدن كريم ولانخيناه بيبان
طهارة اصله والعطايا جزيله

واحدن ذليل وذله بوكر الادمان
واحدن رفعه الله وزود نخيله

واحدن ينام وسكرته فالمسيان
واحدن بكل الوقت ياعزتي له

واحدن تمرجل فوق حرمه وورعان
واحدن رفع نفسه وطفى فتيله

واحدن ورا طرد الحراريم هيمان
واحدن يغظ الطرف لاشاف شيله

واحدن حفت رجله ورا طرق لبنان
مفتون في طرد الفتن والرذيله

قرب تعال اسمع لذا العلم يافلان
شف كل علم لك غيومه مخيله

اسمع ذكرت الك انا كل الالوان
شف اي واحد انت تب تنتمي له

واحذر تقرب لم ذربين الايمان
ماكل خبلن يشبه لفعل خيله

© 2024 - موقع الشعر