دني دموعك

اضحك وداري همومي كل مابانت
واسج لاضاق صدري فالخلا الخالي

امّا اجوس الوسيعة كل ما شانت
ولا تنادمت لا ضاقت مع دلالي

لاقلت هانت يقول الليل,وش هانت؟
ون قلت سهله يقول القلب .شف حالي

كني محكومن وساعة ذبحته حانت
عزّ النصير وتذكّر ربّه العالي

وجدي على اللي يطول الوقت ما خانت
اوفى من هْمومي الي داحمة بالي

اصونها بالهوى لامنّها صانت
قلبي لها دار ٍ و مدهل ومنزالي

موّنت قلبي عليها وهي بعد مانت
لين طْعنتي وخلتني على فالي

مدري تغابي او ان قلوبنا رانت
مدري . ولكنّ قلبي دمدم ٍ بالي

بعيونها كنت كل الكون ,وهي كانت
الكون كلّه ولا اغلى منها غالي

ياوجد حالي على الي كل ما زانت
يردّها الوقت قفر ٍ مشهب اللالي

دام الحياة إن صدقنا فالهوى دانت
دنّي دموعك ونا بادن موّالي

ليت الذلول اللي اقفت فيك ما توانت
لاوالله إلا يا ليت الأرض تنزالي

مدري ردى حظّ ٍ او عدواننا عانت
عين الحسد منّها الجيلان تنهالي

لو اشتكي الهمّ لصخور الهدا لانت
ناره وشبّت بجيب الثّوب والشّالي

اضحك لو إنّ القطيعة بيننا بانت
اخاف لاسكت تجيب العين همّالي