الوقوف على الديار - محمد المرشدي

ودعوني في وقوفي هنا والا قفا
في مكانن فيه الاقدام تختار الوقوف

بانت أطلال(ن) وقوفي لذكراها وفا
موقع(ن) لاجيته ابطيت ماأطريت النكوف

كن هاجوسي وهمي لياجوه حلفا
وكن الارض وماحتوت ضدي أتشيل الصفوف

خيم خيال(ن) بقلبي من الحزن وضفا
أرعده بين المحاني وقافيته شعوف

لوبغيت أخفيه وأجحد رشاشه ماخفا
مايجي حسب أختياري ولاحسب الضروف

سال دمعن عن محاجر عيونه ماعفا
ومن كثر ماأحاول أخفيه جرحت الكفوف

ليه لن الهاجس ليا تذكرها لفا
وليه لن النور بعده خطير(ن) بالكسوف

يوم كل اللي بعدها تعكر ماصفا
صار وارد هم قلبي بخانات الالوف

شوفها طب لروحي ولقياها شفا
وبعدها خلاني أصير عبرة من يشوف

الفراق أسهر عيوني وجفني ماغفا
واللقى غابت بروقه ورى حكم الضروف

© 2024 - موقع الشعر