حب غالي - أماني العُمَري

يقول إنه غدا بعدي حزين وساكنته هموم
ولكن قسمته إنه يعيش بعيد عن عيني

طلبني أنساه بالمره وطلبني أرضى بالمقسوم
تركني وقلبي ينادي أمانه لا تخليني

وعدني ما أشوف الهم ولا حتى يجي في حلوم
وراح وسابني للهم ومن بعده يسليني

نسى قلبي وخلاني أعيش بدنيتي محروم
وصارت دنيتي تاخذ ولكن دون تعطيني

وبالصدفه لقيته اليوم على شط البحر مهموم
ويومه شافني تذكر سنين بينه وبيني

مسكني وقال سمعيني من اللي من الخطا معصوم
بعدها بردت أطرافي وصار الخوف كاسيني

حقيقة ما قدرت أنسى سنيني اللي مضت لليوم
ولا حتى قدرت أمنع يديه تلامس ايديني

رجعت لحبي الغالي وأمانه لا تزيدوا اللوم
وإذا جينا لكلام الحق ترى حبه يكفيني

عسى الله يخلي قلبه لي ولا يحرمني منه دوم
عسى تبقى محبتنا وعسى الله له يخليني

© 2024 - موقع الشعر