برنامج الخيل في التلفاز ذكرنا - عبدالله الودعاني

برنامج الخيل في التلفاز ذكرنا
الغالي اللي يطري دايماً خيله

وهاض قريحة جميل الشعر وأرسلنا
قصيدة(ن) ما توفي قدر من هي له

الغالي اللي عرف يرسم تعاملنا
بأسلوب فن جميل أخطر من الحيله

ما ودنا إنا لما أخفيناه فصلنا
لكن هاض الخفوق وجاب تفصيله

يازين ياللي لك أعلنا تنازلنا
وضحيت لجلك ومن غيرك إنضحيله

هل تعلم إنا عشقناك وتمشكلنا
وأسلوبك العذب صادتنا محابيله

وإنا من الحب قد تبنا وهونا
وقلوبنا عادها خضر(ن) وتوميله

وخليتنا ننقض اللي للعرب قلنا
إنا كبرنا على الحب وعلى جيله

وهل تعلم أنك أول إنسان(ن) يغربلنا
ولا قبلك أحد(ن) تبنا الفكر حبي له

وإنك أول إنسان في عهده تعلمنا
طعم الوداد الحصحيح وطعم تمثيله

وإنك أول إنسان عذبنا ودلعنا
وإنك أول إنسان تسحرنا تعاليله

وإنك أول إنسان لو يخطي تجاهلنا
ماصار منه وجزاه إنزيد تدليله

واللي يحليك لا أخطينا تحملنا
ورضاك ما تسطيع النفس تأجيله

ولا قبلك أحد(ن) بخلقه لا تأملنا
غصب على العين تعجب به وتغضيله

ومن قبلك ابكا النواظر يوم ودعنا
وصرنا نعشق الدروب اللي أتوديله

ما ضني أنساك لو حتى تقاطعنا
ولاعقبك أحد بهذا الشكل بصفيله

واليوم من دون رغبتنا لك أعلنا
السالفه من بدايتها إلى الليله

من شأن نطلع بعذر ولا تحملنا
حمل(ن) من الشوق ما نقدر على شيله

وإنا علينا الوفى والله يجملنا
يامن جميلك سبق ذكره وتجليله

أهم شي إنك ماتقطع تواصلنا
وبستان الأحباب ما نفقد محاصيله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر