علامة الحق

يا حوسة الطين لا زاد البلا / بلّه!
من ينفخ الروح بالتمثال وآطيعه؟

ماني ب شاعر بلاط الغي لا والله!
شعبي وطبعي عصيّ بقيد تطبيعه

جيت انفث القاف لغز يتمتمه حله!
أنفس من المدح فيه انفاس تقريعه :

( قطفه من النور وامن الطايفي سله
ومن كوثرالشعر كاس اترف ينابيعه

وامْن التحايا "كلام اهل الكرم كله
" مع : صادق الود والتأييد والبيعه )

ل مِدافع الضيم بذراعه عن المله
الرعب من ضربته " خاتم بصابيعه"

حربي وبالسلم عزة نفسه جِبِلّّه
مطلاعه الصعب واصعب شي تطويعه

ياصالح الصالح من الناس ياقله
والطالح اشكل على التاريخ توزيعه

العِرض تحت الطلب والارض محتله
والناس تدري ولا تدري وش الضيعه

الفاعل اعقل من الغافل عن الزله
والجاهل اهدى من الكاتب و"تطبيعه"

والمفتي المفتري فتواه ياغِله
اكبر من الشرك الاكبر شرّ توقيعه

شوعي وجودي يهودي علته عله !
سني ويبكي على "البابا" مع الشيعه !

شق ال جهاد ب هجاد النفس والغلَه
ياخيبة الثوب والراقع وترقيعه

وياصالح ان جاك "خلّي" وصّه وقله :
( عليك باللي "كتاب الله" مواضيعه

علامة الحق دايم وآهله قله
ماتغني الكثره بقانون تشريعه )

حبله على غاربه وافطنله افطن له!
حده على اقصاي وان ردّ النقا ذيعه !

صلوا عليه اللي لاصلوا عليك الله
صلى وسلمك من ناره وترويعه