مخاريـم معروفـيـن تاريخـنـا لازال

ألا ياصديقي ليه عنّا اليوم اتسال
مع انّك تعرف امجادنا أول وذالحيني

ابا اعلمك مير افهم العلم دون جدال
تمعن كلامي وافتح سموع الأذنيني

إذا انّك تجاهلنا فباعلّمك في الحال
اباعلمك ذالحين ماهوب بعديني

ترانا الرّجال اللّي لنا في العلا منْزال
ولامن تعزوينا تهجد الشّياطيني

وترانا رجال في اللّقى نكعم العيّال
ولاخير في هرجٍ بليّا براهيني

مخاريم معروفين تاريخنا لازال
يجدد وعرف بنصرة الحق والدّيني

مخاريم لامن ذبح من ربعنا رجال
ماناخذ قضاه من العدا كود رجليني

ثنين بشرط انهم يكونون من الأبطال
والأنذال مانقضي بهم نايب الدّيني

مخاريم معروفين لاصك جالٍ جال
عصاة العرب يقفون عنّا مطيعيني

ومن لّاذ بحمانا غدينا عليه ضلال
على الجار سهلين وعلى الضد قاسيني

و بنا الهضب وآمنةٍ حدوه سهل و اجبال
تبيه القبائل مير حنّا معيّيني

حماته رجال والمراسيم روس رجال
نرسّم حدوده بالرّجال المسمّيني

ومنّا ((ربيّع)) نصرة الدّين صال وجال
بوقتٍ مضى فيه أكثر النّاس عاصيني

وهداهم إلى الإسلام في كل ابو الاحوال
إلين اصبحوا بأركان الإسلام راضيني

وتأمر على الوادي على اجيال بعد أجيال
و قاد الجيوش اللي تدك المياديني

وله هيبةٍ منها رزين العقل يهتال
وتواريخ نجدٍ له عليها عناويني

هذي نبذةٍ عن لابةٍ توفي المكيال
ألاد المنيعي ملحقين المخلّيني

وتمت وصلوا عد ما يمطر الهمّال
على سيد الأمه رسول الثقليني