أعترفلك

أعترفلك .. إن قصّرت بهواك
واعترفلك .. كنت دايم أجرحك

واعترف إني تهاونت بعطاك
وان كم مرة تناسيت اشكرك

واعترف إن الملل شفته معاك
وان كنت بكلْ بساطة مهملك

واعترف إني تساهلت بْرضاك
وان قاصد يالحبيب اتجاهلك

وش بلا هالوقت مشتاق لجفاك
يوم ازعِّل بك ويوم(ن) أهجرك

وش بلا هالليل يستحلي بكاك
حاضر(ن) لجل استثارةّ دمعتك

وش بلاني قاسي(ن) وانت ملاك
كن مخلوق(ن) لجل ما أسعدك

اكتشفت اني تلاعبت بغلاك
وان جاوزت الحدود بعشرتك

الحقيقة (غصب) انا أحيا بلاك
والله اني يالغضي مَ استاهلك

فكّر بعقل وتجاوز مبتغاك
لا تخلّي العاطفة تستحوذك

إرحل ولا تلتفت لحظة وراك
ما بقى شي في خفوقي يجذبك

إنفذ بحسنك قبل تفقد حلاك
روح دوِّر لك حبيب(ن) يشغلك

روح يامجروح انا قلبي نساك
وش تبي فيني وانا ما أعشقك

روح واقسى يا عسى تلقى عساك
عاشق(ن) صادق بدالي ينصفك

روح وانسى ظالم(ن) توّه رماك
روح واروي للخلايق قصتك