مرثية الملك فهد - نوض سدير

يا ْطيور مامثلك أبد شفتنا طيور
طير ٍ طعن قلبي وطير ٍ تقفّاه

طير الحزن عم ّ الفضا يدور ويدور
اسقاني العلقم وجرّعني الآه

العين تبكي ودمعها صار منثور
بكا اليتيم اللي فقد من تولاه

مات الزعيم وضاقت صدور وصدور
وكل ٍ على موته تزايد به بكاه

والله لو راحت بنا سنين ودهور
انّا نموت وهالفهد مانسيناه

فهد العروبة سيّد الراي والشور
والشعب في ظلاله لقى ماتمناه

الحاكم اللي مايجي منّه قصور
يشهد له العالم من ادناه لاقصاه

الحب لك ياراعي الطيب محفور
في قلب يعجز يوم الاثنين يمحاه

والمجد لك مسطور مسطور مسطور
في صفحة التاريخ صيته وذكراه

واليوم ياتاريخ سجل بلا قصور
مجد الزعيم اللي خدم بيت مولاه

ياغافر ذنوب ٍ وياميسّر امور
وياشافي ٍ أيوب من عقب بلواه

تجعل على قبره بساتين وزهور
وتجعله بالفردوس والحور وياه

وتوسّع بقبره وتملاه بالنور
وتفرغ علينا صبر والهم تجلاه

© 2024 - موقع الشعر