تامر على شي ؟ - عبدالعزيز السبيّل

ياجارح احساس المحبه / سلامات
تجرح وتسرح والمحبه كما هي

ذبحتني بمحبتك عشر مرات
على الرغم من ذبحتك هذا انا حي !

من قبل لا اقابلك ماتعشق الذات
ومن يوم شفتك / صادروني هل الغي

وقطعت من شانك جميع العلاقات
وطوتني الدنيا على طاعتك طي

اعشقك واحبك واداريك بسكات
كثر الجروح اللي تجي من يدك في

ومن كثر حبك لا لفت منك كيّات
اقول لك:- مسموح واقبل الكي

واخاف ما املك شئ وتقول لي:- هات
واقول:- تبغى ذي ولا تبي ذي !!

بخيّرك ولك الأمر بالخيارات
اما تجيني لي ولا تجي لي !!

لاتحسب اللي بينا بالمسافات
وانت اقرب لثوبي على مسكة ايدي

بسهر معك والليل قلّه سهالات
ماني بخايف عتمته دامك الضي

سبحان من بيديه سبع السماوات
خلا../ عيونك شمس ورموشك الفي

كتبت فيك ابيات وابيات وابيات
وإليا لقيتك قلت:- لاوالله / شوي !

ميّت ولكن ماني بضمن الأموات
ميّت بحبك وانته تشوفني حي

وإن كان حبي مات ليه المعانات
انا بروح اموت / تامر على شئ ؟!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر