معطى ومحروم !!

ليتكم تدرون ياناس في شيٍ يحوم
جوف صدري من همومٍ تضيّق وسعته

زاد عمري والليالي تزيد (أ)لي الهموم
والدهر لابدّ للرجل يطفي شمعته

دورة الايام تتعب قويين العزوم
كم راسٍ انتكس عقب حصل رفعته

عقب كان الرقم الاول على كل الرقوم
مات حظه بين ربعه وشانت سمعته

أقنعه قول المثل فيه معطى و محروم
وان نفسه لو تسوقه ما تأمن رجعته

الدهر من دونها والقدر يحصل لزوم
والليالي تقدر ابضرته مع نفعته

والحقايق واظحه كل حين وكل يوم
والبنادم ماله الاّ الطريق و قطعته

البحر مايسبحه كود غطاسٍ يعوم
ما يهاب الموج لو كان مقوى دفعته

والرجل يبقى على نهج ربعه والسلوم
ما تغيّر لو حصل ما يشتت جمعته

جامعٍ كلمة رجل مع مقدّر و محشوم
ولا حظر كنّه شبيه النجم في طلعته

ولو يواجه من زمانه غرابيل و هموم
ما شكى ضيمه ولا يظهر (أ)لنا دمعته

ما شكاه الاّ على خالقه ربٍ رحوم
واحدٍ يفزع لعبده وتشفي فزعته

والرجوله ما حمتها رياجيلٍ رخوم
خانت الرفقه و عهد الصداقه باعته

جعل من سوى عملهم يا حظه ما يقوم
وجعل ربي ما يكافيه شرّة رمعته