السذاجه

يا قلب يكفي لي متى هالسذاجه
ما من ورا هالطيب الا وجع راس

ضحيت بالغالي ولا نلت حاجه
غير الشقى اللي جاك من اقرب الناس

اصحى وغيّر مبدأك وانتهاجه
اللي سقاك بكاس تسقيه من كاس

في هالزمان الغدر يلقى رواجه
صار الوفا ما له ابد اي مقياس

ناسٍ تلف وتدور صعبه.. تواجه
وناسٍ تمارس ظلمها دون احساس

احدٍ يجيك ويفتخر ب اعوجاجه
واحدٍ بقوة عين يفتن وينباس

لأتفه الأسباب يبدي احتجاجه
ولأخطر الاشيا ما يقول لا بأس

لي من نصحته شوف كيف انزعاجه
واذا تركته بالخطا قام يحتاس

لي قلت له..(ابعد) تغيّر مزاجه
وان قلت (قرّب) اشتعل فيه وسواس

عقله صغيّر مثل عقل الدجاجه
سطحي ومتناقض ومفلس وحسّاس

شخصيته بين الغبا والسماجه
متمرجٍ بين التفلسف والافلاس

يبرم في اشنابه ويعقد حجاجه
ما كنه الا مهرجٍ بين جلاّس

ولي هاج بحر الشعر ضاع بهياجه
ما ينفعه ماله وسلطه وحرّاس

ولي قالوا الشعّار ابدع وواجه
وانثر نتاجك من ادب فوق قرطاس

تتغير الوانه وينسى ابتهاجه
وتظهر تجاعيد الخجل كنّها اقواس

كنه حشر جسمه بعنق الزجاجه
ما يدري ان الفاس قد طاح برّاس

يمشي كما الطاووس كبر وْهماجه
ما كن به في الارض غيره من اجناس

دامه كتب بيتين واشعل سراجه
يشوف نفسه في سما الشعر نبراس

مايدري انه انحبس في سياجه
وتاه في صحرا القوافي والاطعاس

لو فكر بعقله ويعرف خراجه
ما كان دم (كليب)في راس(جسّاس)

لي صار مزمن هالمرض وش علاجه
ما غير نستأصل جذوره من السّاس