الصاحب الذرب

يالصاحب المزيون يالوافي الذرب
ياللي تملكت الحشا بالذرابه

كلك على بعضك تجنن وتطرب
من يعشقك يلقى بعشقك طرابه

الحال من بعدك حبيبي ترى خرب
والقلب خلته المآسي خرابه

عوّد علي ياقبلة الشرق والغرب
وارحم عيونن صايبتها الغرابه

ليتك تجي ذلحين وتشوف عن قرب
وش حالتي يابعد كل القرابه

خلك سهير الليل ويناظر الدرب
حتى يبان الصبح محدن درابه

خلّك ترى من رحت محتاج للشرب
ضامي ويبغي من غرامك شرابه

شبّت بعد فرقاك في داخلي حرب
كلن يبيك اول وماسك حرابه

محتاج لك بالحيل يالوافي الذرب
ومشتاق انا يابو النقا والذرابه