حتى ايش ( صدى وصوت ) - سعيد القير

حتى ايش لو اشكي لك الحال حتى ايش
تشره علي لا قلت لك حالتي ماش

لكن باعلل لك الوضع بشويش
صدر القصيده ايش والعجز في آش

مانيب شاكي قلة المال والعيش
لكن باشكي حسرتن داخل الجاش

لاتقول بعد الشرح ياصاحبي ليش
فقول مات القرم يوم الردي عاش

الباسقات الخضر منتوفة الريش
عقب الخضار اللي له العقل ينداش

الله واكبر يازمان التطانيش
والله يقلع رفقة النذل واللاش

سقت القصيده لك وسقت المطاريش
شرواك يابراهيم ماعاد يناش

يابن مريع فتش القاف تفتيش
تلقى لبو بندر تفاكير حشاش

لو لا الامل بالله والله ماعيش
والخيرفي رجواه ماهوب منحاش

**********************
************************

رد الاخ العزيز الغالي
ابراهيم بن مريع القحطاني يقول

**********************
************************

ياسعيد ساقتك الهقاوي على الطيش
والنفس يغريها الآمل كل ما طاش

تشكي علي والوقت عسر المناويش
شان وتغيّر بين حاسد وغشاش

وشلون تبغاها تزين المعاويش
والدار صارت للدراويش الاحباش

عقب الرخاء حلوا كبار الطرابيش
والأرض جفت والفضاء مابه ارشاش

والباسقات اليانعات المهاويش
يبست وصارت بين صارم وحشاش

اقلوبها عقب الدهر عودّت حيش
وسلوم أهلها عودت هوش واهواش

راحت مراح الجيش لا قابل الجيش
وطاحت مطاح اللي يكفن بالانعاش

واليوم ياللي تنقش الحرف تنقيش
بعض الحكي ماهو بيحتاج نِقاّش

قصايدك وان جات باسلوب تحشيش
وصلت على ماقيل ماعاد منهاش

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر