خزنة كرامه ...

أنكان مستقبل عيالك يهمك
سكّر على الحاجه بخزنه ومزلاج

حتى أخوك اللي من( ابوك ومك )
لايدري أنك يابيض الوجه ( محتاج )

وأحذر من أخوانك ومن ( بني عمك )
( الصمت حكمه ) والمقادير درّاج

يمكن ولد عمك يساقيك سمّك
وأنته تخاف من ( الفضايح ) والأحراج

ولاتلتفت للي ليا / أقفيت ذمّك
خلّه على ماقالوا / البدو ( مسهاج )

وليا / أمتلا صدرك وقزّاك همّك
لاتشتكي وقتك على كل دواج

كبّر على صدر الليالي معمّك
تصبح لك الدنيا ( قطيفه وديباج )

وأحذر من ( أبليس الجماعه ) يخمّك
فرقاه ( للقالون والقرحه ) اعلاج

خلّك بحر ماغثرب الطين جمّك
هادي وتخشاه المراكب ليا هاج

بالك يفور من المقادير دمّك
الوقت ماغير ولاشي ف سواج

وللضيف والعاني ومن مال يمّك
خلّك لهم عدٍ كما عد هدّاج

نفّذ لهم لو ضامك الوقت كمّك
ترى الحياه أيام والناس هرّاج