سفينة حلم - فتون العنزي

أنا مانيب مجبورة أجاري نزوته وياي
على كيفه يبكيني وثم يرجع يراضيني

يبي اسكت ولا تكلم أداري دمعتي وبكاي
يزيد بطعنته جرحي ولا بكلمة يواسيني

يجيني عابسٍ ضايق يزعزع لهفتي ورجاي
وأنا تّحمل جفا همسه وصده لي مأذيني

أشوف الصد بعيونه يبي ينسى يبي فرقاي
يدّور للزعل اسباب ويرحل ثم يلفيني

وقول لنفسي لايمكن أكدر صفوتي ومساي
أببعد عنه بحلامي وخل قلبه مجافيني

سفينة حلم تاخذني وأنا بقربه لأقصى مداي
أبنثر عطر أشواقي وتقطفني رياحيني

أبنسي حزني وآهآتي وأبدل خطوتي وممشاي
أبرسم للهنا لحظة وطيف الحب يناديني

مدام الصبر ما ينفع أبنسى والتهي بدنياي
أعاند قسوة أيامي وأضم الحلم بِإيديني

© 2024 - موقع الشعر