المشراف

ياليت ما جيت للمشراف
وياليت يالرجم ما جيتك

ذكرتني ماضين قد طاف
لا ضاق صدري تنصيتك

اشكي وبي منك الانصاف
ويطول وقتي ولا وحيتك

حزني على كامل الاوصاف
ليتك تقدره يا ليتك

لو شفت زينه ورجمك شاف
ان كان بالحزن انا عديتك

ولاجيت يمي وفيك اشعاف
مشعوف مثلك وضميتك

مانيب اجنب عن الميقاف
تركت نفسي وبديتك

زين الوصايف ترى ما عاف
لو عاف يالرجم خليتك

بتركه لو كان قلبي راف
وما كان بصوت انا شقيتك

الارض له مرقدن والحاف
ومن شان مرقده حبيتك

نصايب القبر منك تشاف
لو كان لك عين وريتك

واليوم انا جيت لك ميلاف
جيتك بسليك وبكيتك

كنت احسب انها عليك اخفاف
يا الضلع والله تقاويتك

كيف الرواسي تصير اضعاف
شفني على الحزن عديتك

يالقبر انا شوف خدك جاف
لو تدمع العين لسقيتك

مدامع العين جاها اعجاف
خمسة عشر عام ما غفيتك

وذلحين رجلي على المهياف
ومليت مني ومليتك

الحزن خلاء العظام انحاف
وتعبت يالرجل وحفيتك

لكن بوصيك يالمشراف
دخيلك القبر ووصيتك