ماله عيوب

البارحة ساهرن وجر موالي
مع هجعة الناس ضاق الصدر من مابه

بغيت انا النوم لكن ما تهيالي
جلست يوماً كلٍ سكر أبوابه

جلست مع ذكريات الصاحب الغالي
اللي همومي وضيقاتي من أسبابه

اللي تركني مع الهوجاس بلحالي
أصارع الشوق والاحزان بغيابه

لامن ذكرته يسيل الدمع همالي
عبرات حزنن من العينين سكابه

وأشتاق شوف المكان اللي على بالي
اللي به أذكر زماناً فات وأسلابه

حتى لو انه خلى ومن البشر الخالي
يكفيني اني عرفت انه تمشابه

فيه اشتكي له وجاوب حالي بحالي
من حرقةٍ وسط جوفي منه شبابه

احيي بذكره غلاً بالقلب ما زالي
قلباً يحبه لو انه يكثر أعتابه

مهوب عبر الزمن ناسي ولا سالي
قلباً وفياً وفاء في عشرة احبابه

صابرلو ان الصبر في غيبته طالي
حتى لو ان الصبر شيبه وشابه

وما نيب انا أول مصاب ولاني التالي
قبلي من الحب ناساً منه منصابه

حظي وراضي بمقسومي وما جالي
العبد ماله عن الاقدار مجنابه

يا ناس ياللي جداكم قيلاً وقالي
لا صرت مبغا النصيحه ماهي أطلابه

قولوا لراع النصيحه ماله ومالي
وش دافعه يوم لجلي محرق أعصابه

ما جيته اشكي من همومي وغربالي
جرحي وهمي من المحبوب و أرضابه

ما جاء من الزين راضي به ويحلالي
يبقى بصدري وحفظه مكشف أحجابه

خلوه انا فداه ذا محبوبي الغالي
ماله عيوبن لونه طول اغيابه