يالله دخيلك

يا ليتني بالعمر..خطيت خمسين
ومن فوقها عشرٍ تذيبه حلايا

وترخي تجاعيد الزمن عمرها لين
عافت ملامح وجهي أحلى المرايا

من بعد ما شفت الصبا عوده يلين
مابين معفين اللحى والصبايا

وشفت الشباب يموت والناس حيين
مذبوح ظلم وما أنصفوه البرايا

معاد لي شفٍ بعمر المزايين
ومعاد بي حيل ٍ يطيق الشظايا

ومن لامني لا يسبق العلم ويدين
قبل ٍ يمد الشوف عذب السجايا

ويكحل أهداب الزمن فيه والعين
بأفعال منهم بالتساهل عرايا

ضاع الشباب اللي له الناس شارين
ضاع ابيديهم وأسرفوا بالخطايا

خطواتهم عكس وشعاراتهم بين
اغنم شبابك والعمل بالنوايا

هذا معَ ذا تاه بشمال ويمين
ودروبهم تشكي ثقيل الوطايا

والبعض كنّه جاهل ٍ ما قرآ الدِين
وفكره عقيم ولا تفيده وصايا

ما تنفع الحسرة ولا قول بعدين
وقت الصبا للخلق مثل الهدايا

العمر يمضى والعمل وحده الدْين
والذكريات اجيوش وسط الخلايا

ولو للشباب لسان وعيون ويدين
يهجر جميع أجساد كل الطغايا

يقسم قسم حنّا لموته محبين
ما راعنا في يوم سهم المنايا

يا لله دخيلك ترفق بكل مسكين
من سطوة الجهل ابعقول الضمايا