الذيب ذلّ الجنّ من قوّ نابه

يا كليب لا تنبح ايلا من عوى ذيب
وين انْت يا معفن ووين الذّيابه

حدّك على اطراف المراعي لويغيب
والّذيب فوق الجال كلّن يهابه

اضلوع صدرك من قنيبه محاطيب
وضلوع صدره مدهلن للسحابه

تنبح وصوتك ردّته شمّخ النّيب
والذيب ذلّ الجنّ من قوّ نابه

ماهن سوّه , لوهن جميعن مخاليب
الذيب ذيييييبن , والكلابه كلابه

لكليب ماخلقن طوال المصاليب
بين الغنم يلهث ويقطر لعابه

ماهو خصيم لي وهو بعْده كليب
ون صار كلب ٍ ما احسّب حسابه

للذّيب في صدري مكان وتراحيب
لانّه وفيّ لكل جالن رقابه

والسّاقط الي ما يعرْف المواجيب
لا شاف عظم ٍ يلقطه من ترابه

لو كنت برمي لكل نابح مكاتيب
ضيّعت تال الوقت طبع الذّرابه

ارقى بنفسي فووووق عن موطن العيب
ولا والله انّي صاحب لْقوم طابه

ما يثمر المعروف الا بولد طيب
والا الرّدي \ كلب ٍ ولغ في زهابه

ما هي غريبة زلّة ابن الأجانيب
مرباه غالب والعفن في ثيابه

ولا والله إنّا للهلامه معازيب
اللي ينوّخ للرّديّه ركابه

ما هو سفير ٍ للرّجال الاشانيب
كبار البيوت وبيت مثله خرابه

اهل السّموت فحول \ عِربن غواليب
وإلا الفسل سمته يجيب الكآبه

لو كان يعْلم وش يخبي له الغيب
ما تطرحه سكرة \سببها شرابه

ولو يفتهم ما لجّ روس المراقيب
اللي بها ذيب ٍ عزيز ٍ جنابه

الكلب يوفي \يا كثير العذاريب
والا انت ( كلب الخون ) كلّن درابه؟

يا كليب \ مخلابي شنيع المضاريب
لو علّم بْوجهك تعاف الحرابه

نابي , سواة الرّمح \ سيفي لواهيب
ولا مسّك (ا)مْن السّيف إلا جرابه

اعْرف وش اللي دخّلك بالمصاعيب؟
انْساك حلْم الذيب شرْع الذّيابه!