الليــله

الليله .. آشوفه جفا عينك النوم
وجيت وخفوقك من عنا الشوق ذايب

يا صاحبي فالناس معطى و محروم
وشكوى ً لغير الله عذاب ونشايب

ما تبري الشكوى على الناس مهموم
آقولها .. والناس مخطي وصايب

فإن كنت من ميلات الأيام مزحوم
شكواك للّي به تهون النوايب

لا تشتكي ما صايبك .. غير مقسوم
وعمر الشكاوي ما ترد الذهايب

ولاتعتذر لي .. مأنت فالعذر ملزوم
ولا ْ تشرح لقلب ٍٍ جرحته سبايب

ولا ْ تحسب إن جفني من النوم مفطوم
وألا ّ أنْ ضلوعي من ولعها لهايب

هذا أنت غبت إسبوع غير أمس واليوم
وأقفيت كنّك من غثا الحب طايب

ماشفتني في دربك آطيح وآقوم
ولا ْ سقت في رجوى رضاك الركايب

لاصار ما للحب في قلبك إرسوم
وش عاد لو تبقى على طول غايب !!

كلّش يجي بالغصب ياباشة الروم
ألا ّ المحبّه ماتجي بالغصايب

ول أقفيت عنّي بأبعد إخطاي وآشوم
وأركز على قبر الغرام النصايب

وآقول تبقى يا أصبح الوجه واتدوم
والله معك .. و فجوج ربّي رحايب

وإن صحت لي يا ظالم الحب (مظلوم)
قلت الله أكبر .. يا زمان العجايب

يا هيه قبل إتلَحِِّق اللّوم باللّوم
قِلْ ويش جاني مِنْك غير العقايب ؟!

يوم ٍ رفيقْ . ويوم ينحِي بك الحوم
وغير العنا مالك بصدري جلايب

إن غبت لِِعْت القلب بحروق وهموم
وإن جيت غير الجرح . ويش أنت جايب ؟!