ذيبي اللي في الحشا__سامريه

ذيبي اللي في الحشا يعول عوالي
منه قلبي طار لولا عراويّه

إنتقض جرحي وانا دالهٍ سالي
ولي عيونٍ تسكب الماء رهاويّه

اااه واحراه من فقدة الغالي
والله أكبر يالعيون الشقاويّه

كأني الا من تولوه الأبطالي
صوبوه وطاح بأرضٍ خلاويّه

كم تمنى فزعةٍ له ولانالي
لين صار الموت غاية مناويّه

عايشن واشوف بالعين قتّالي
ظالمٍ مافيه رحمه وماويّه

كم هقيت الوصل منها ولا جالي
وأخلف الله من خفوقي هقاويّه

مهرةٍ ما عنّها كل خيالي
حطها الله فتنةٍ للهواويّه

مهرةٍ في مربط العز تجتالي
من عرفها القلب زادت بلاويّه

سرقلت جسمي عسى مالها والي
شوشت عقلي وكثرت هذاويّه

غاليه عندي وانا عندها غالي
والمحبه غصب صارت سماويّه

كل حيٍ شد عوّد لمنزالي
ياربيع الوصل عيني سناويّه

طاوين حبل الرجاء فوق محالي
مجهدٍ في طويته زند طاويّه

مابقى لي غير همٍ برى حالي
وسجةٍ للفكر بين النداويّه